Agendas, reports and minutes

Cumar coinneamh de Bhuidheann Buileachaidh na Gàidhlig ann an Seòmar na Comhairle, A’ Phrìomh Oifis, Rathad Ghlinn Urchadain, Inbhir Nis air Diardaoin 10 Samhain 2016 aig 10.30m.

Brath Craoladh-lìn:  Thèid a’ choinneamh seo a chlàradh is a chraoladh thar an Eadar-lìn air làrach-lìn Chomhairle na Gàidhealtachd. Thèid an clàradh a thasgadh is chithear e airson 12 mìosan às dèidh sin. 

Tha cuireadh agaibh chun na coinneimh agus tha clàr de na gnothaichean air an tèid beachdachadh an cois seo. 

Leis gach deagh dhùrachd,

Michelle Morris
Iar-Àrd-Oifigear/ Stiùiriche an Leasachaidh Chorporra

Thoiribh an aire gum bi a’ choinneamh air a cumail sa Ghàidhlig, le eadar-theangachadh mar-aon gu Beurla. 

Gnothachas

A Bhuill Chòir,

1. Leisgeulan

2. Foillseachaidhean Com-pàirt

Thathar ag iarraidh air Buill beachdachadh a bheil com-pàirt aca a bu chòir dhaibh fhoillseachadh co-cheangailte ri gnothaich sam bith air clàr na coinneimh seo.  Bu chòir do Bhuill a dhèanamh soilleir an e com-pàirt ionmhasail no neo-ionmhasail a tha seo agus beagan innse mu nàdar na com-pàirt. Gheibhear comhairle a thaobh seo bho Oifigearan mus tòisich a’ choinneamh.

3. Naidheachdan Matha

4. Taisbeanadh – Leasachadh Sgilean na h-Alba                    
Bheir Mgr Derek MacCoinnich seachad taisbeanadh mun dàrna tionndadh den Phlana Ghàidhlig aig Leasachadh Sgilean na h-Alba agus gnìomhan co-cheangailte ri bhith a’ buileachadh Plana Gàidhlig Leasachadh Sgilean na h-Alba.

Thathar ag iarraidh air a’ Bhuidhinn beachdachadh air an taisbeanadh.

5. Taisbeanadh – Stòrlann                        

Bheir Mgr Dòmhnall Uilleam MacIlleMhoire, Àrd-Oifigear Stòrlann Nàiseanta na Gàidhlig – companaidh earranta a bhios a’ co-òrdanachadh dèanamh is sgaoileadh stòrasan curraicealaim airson foghlam Gàidhlig – seachad taisbeanadh a’ mìneachadh obair an Stòrlainn agus a’ toirt iomradh air na stòrasan a tha rim faotainn. 

Thathar ag iarraidh air a’ Bhuidhinn beachdachadh air an taisbeanadh.

6. Plana Gàidhlig 2012-16, Cuspair 5 “Na nì sinn airson na Gàidhlig anns an Àite-obrach agus ann an Leasachadh Eaconamach" agus Cuspair 4 “A’ Ghàidhlig san Àite-obrach” – Aithisg Bhuileachaidh 

Tha Aithisg Àir. GIG/16/16 le ceann-latha 31 Dàmhair 2016 ga cuairteachadh le Stiùiriche a’ Chùraim agus an Ionnsachaidh a’ toirt cunntas às ùr mu bhuileachadh Plana Gàidhlig 2012-16, Cuspair 5 “Na nì sinn airson na Gàidhlig ann an Leasachadh Eaconamach” agus Cuspair 4 “A’ Ghàidhlig san Àite-obrach”.

Thathar ag iarraidh air a’ Bhuidhinn:-

i. beachdachadh air buileachadh nan Cuspairean Leasachadh Eaconamach is Àite-obrach; agus 
ii. aontachadh gum brosnaichear margaidheachd Dhreuchdan is Chothroman Obrach Gàidhlig le Leasachadh Sgilean na h-Alba agus Bòrd na Gàidhlig.

7. Mòd Nàiseanta Rìoghail 2016 agus Mòdan san Àm Ri Teachd ann an Sgìre na Gàidhealtachd 

Tha Aithisg Àir. GIG/17/16 le ceann-latha 31 Dàmhair 2016 ga cuairteachadh le Stiùiriche a’ Chùraim agus an Ionnsachaidh, a’ toirt fios do Bhuill mu leasachaidhean a thaobh (a) am Mòd Nàiseanta Rìoghail a chaidh a chumail anns Na h-Eileanan Siar bho 14-22 Dàmhair; (b) Mòd Loch Abar 2017; agus (c) Mòd Inbhir Nis 2020.

Thathar ag iarraidh air a’ Bhuidhinn:- 

i. beachdachadh air a’ chunntas às ùr a thaobh Mòd nan Eilean Siar;
ii. aontachadh gun cuirear Buidheann Ceangail Mòid air dòigh air thoiseach air Mòd Loch Abar agus aontachadh taic a thoirt do Chomataidh Eagrachaidh Ionadail Inbhir Nis mar a bhios feum air; agus
iii. aontachadh gun cumar ceangal dlùth leis a’ Chomunn Ghàidhealach an dà chuid gu h-ionadail is gu nàiseanta.