Fiughair ga Dhèanamh ri Fosgladh Bun-Sgoil Ghàidhlig Loch Abar

English version of press release can be found here.

Thug Robertson Northern na h-iuchraichean seachad do Chomhairle na Gàidhealtachd air 3 Iuchar agus tha na sgeadachaidhean is na sgrùdaidhean mu dheireadh a’ dol air adhart, agus an cumadh-fearainn agus na raointean goireis air an crìochnachadh mar-thà.

A’ cur ris a’ ghoireis seo, san t-Sultain/Dàmhair bidh Ionad-Coimhearsnachd a’ Chaoil agus Bun-Sgoil ùr Lunn Dà Bhrà a’ fosgladh.

’S e Bun-Sgoil Ghàidhlig Loch Abar a’ chiad bhun-sgoil ùr a-mach à ceithir agus goireas coimhearsnachd ùr airson sgìre a’ Ghearasdain, a bheir seachad goireasan foghlaim air leth, agus cothroman sgoinneil airson cleachdadh coimhearsnachd.

Thuirt Cathraiche Comataidh Foghlaim, Cùraim is Ionnsachadh agus Seirbheisean nan Inbheach, an Comhairliche Drew Mac a’ Mhuilleir: “Tha sgoilearan, pàrantan agus tidsearan a’ coimhead air adhart gu mòr ri fosgladh na sgoile ùire, a bheir seachad àrainneachd ionnsachaidh air leth. Tha goireasan an dà chuid a-muigh agus a-staigh aig gach sgoil ùr agus bidh cothrom aig buidhnean coimhearsnachd an gabhail air mhàl taobh a-muigh uairean na sgoile, mar sin bidh buannachd ann dhan choimhearsnachd air fad.”

Bidh goireas ùr Ionad-Coimhearsnachd a’ Chaoil a’ gabhail a-steach Leabharlann ùr, Ionad-Òigridh a’ Chaoil, Seòmar 13, agus seòmraichean aoigheachd is tallaichean Ionad-Coimhearsnachd a’ Chaoil a bhios a’ gluasad ann.

Faodar na goireasan a ghleidheadh le bhith a’ cur fios gu Ceannardan nan ionadan fa leth.

Thuirt Ceannard Comataidh Sgìre Loch Abar, an Comhairliche Tòmas MacIllinnein: “Tha e na thlachd a bhith a’ faicinn nan leasachaidhean ùra seo a’ tighinn gu buil. Bheir na sgoiltean ùra agus na goireasan coimhearsnachd a tha aig cridhe na coimhearsnachd togail mòr dhan sgìre. Bidh iad buannachdail dhan a h-uile duine is iad fosgailte is rim faotainn taobh a-muigh uairean sgoile.”

Thuirt Cathraiche Buidheann Buileachaidh na Gàidhlig agus Comataidh Sàbhailteachd Coimhearsnachd, Com-pàirteachas Poblach agus Co-ionannachdan, an Comhairliche Sheumais Friseal: “Bidh leasachadh cànan is cultar na Gàidhlig air a neartachadh gu mòr san sgìre leis a’ Bhun-Sgoil ùr Ghàidhlig. Tha buannachdan foghlaim dà-chànanach aithnichte agus cuidichidh an seòrsa foghlaim seo gus a’ Ghàidhlig a leasachadh is a chumail suas am measg dhaoine òga.”

Tha obair a’ dol air adhart cuideachd air co-làrach sgoile a’ Chaoil, le ceann-latha fosglaidh de Lùnastal 2016 airson Bun-Sgoil Chaitligeach ùr Cholm Chille agus Bun-Sgoil ùr a’ Chaoil.